Lífeyrissjóður verzlunarmanna - Ársskýrsla 2020

Ársskýrsla Lífeyrissjóðs verzlunarmanna 2020 Væntanleg þróun sjóðsins og framtíðarhorfur Á komandi árum mun lífeyrissjóðurinn hafa áfram að höfuðmarkmiði að ávaxta eignir innan ramma laga og fjár- festingarstefnu sjóðsins í þeim tilgangi að standa undir lífeyrisskuldbindingum og hámarka réttindi sjóðfélaga. Fyrir liggur að ævilengd íslensku þjóðarinnar hefur verið að lengjast og ætla má að sú þróun mundi halda áfram. Þetta þýðir að sjóðfélagar lifa lengur og munu fá ævilangan lífeyri frá sínum lífeyrissjóði í lengri tíma en fyrri kynslóðir. Þar sem tryggingafræðileg staða er nú yfir 10% bíður það stjórnar sjóðsins að taka til skoðunar breytingar á forsendum réttinda í samtryggingadeild. Þessi sterka staða gerir sjóðinn betur í stakk búinn til að mæta breyttum forsendum sem leiða af hækkandi meðalævi sjóðfélaga, en sú þróun leiðir eðli málsins sam- kvæmt til þess að sjóðfélagar njóta að jafnaði greiðslna í lengri tíma en áður. Gera má ráð fyrir að þessi aðlögun fari fram í tryggingafræðilegri úttekt fyrir árið 2021 og þá verði spár um auknar lífslíkur í framtíð notaðar til að endurspegla hækkandi lífaldur sjóðfélaga og þjóðarinnar. Undanfarin ár hafa lífeyrissjóðir verið meira áberandi í íslensku samfélagi. Þeir eru stórir fjárfestar á íslenskum fjármálamarkaði, mikið hreyfiafl í íslensku atvinnulífi og er lífeyrissjóðakerfið að verða þroskaðra. Það þýðir að sjóðfélagar sem fara munu á lífeyri hafa greitt lengur til sjóðsins sem almennt styrkir réttindi þeirra. Þessi þróun mun halda áfram til hagsbóta fyrir komandi kynslóðir. Með þessum breytingum, sem og öðrum samfélagslegum breytingum sem hafa og munu eiga sér stað, eru kröfur sem gerðar eru til fjölmargra þátta í rekstri sjóðsins alltaf að aukast. Stjórnin leggur áherslu á að á hverjum tíma sé mannauður til staðar innan sjóðsins til þess að takast á við ný verkefni og auknar kröfur. Undanfarin ár hafa vextir farið lækkandi, bæði hér innanlands sem og á heimsvísu. Þetta þýðir auknar áskoranir við að ávaxta eignir sjóðsins sem standa undir réttindum sjóðfélaga til framtíðar. Langtímaávöxtun sjóðsins hefur verið með ágætum og hefur styrkst undanfarin ár en ávöxtun í fortíð segir ekki til um ávöxtun í framtíð. Stjórn sjóðsins, stjórnendur hans og starfsmenn munu áfram leggja sig fram við að ná góðum árangri í rekstri sjóðsins til framtíðar. Ófjárhagsleg upplýsingagjöf LV birtir ófjárhagslegar upplýsingar í sjálfbærniskýrslu sem er hluti af ársskýrslu. Stuðst er við UFS (umhverfis-, félagslegir þættir og stjórnarhættir) viðmið Nasdaq, útgáfu 2 frá maí 2019 (e. ESG Reporting Guide 2, May 2019) og eru tilvísanir í viðauka í markmið Sameinuðu þjóðanna um sjálfbæra þróun, heimsmarkmiðin. Greint er frá viðskiptalíkani sjóðsins og birtar upplýsingar um lykilmælikvarða er lúta að stjórnarháttum og umhverfis-, félags- og starfsmannamálum. Jafnframt er greint frá áherslum er lúta að mannréttindum og hvernig sjóðurinn spornar við spillingar- og mútumálum. Framsetning með þessum hætti á ófjárhagslegum upplýsingum veitir greinargóðar viðbótarupplýsingar um ófjárhagslega þætti í rekstri og uppfyllir kröfur skv. gr. 66-d í lögum um ársreikninga. Við upplýsingagjöf um gerð sjálfbærniskýrslu fékk sjóðurinn ráðgjöf hjá óháðum ytri aðila. Ráðgjöfin fól í sér leiðbeiningar við að greina og miðla upplýsingum um viðskiptalíkan LV, ábyrgar fjárfestingar og umhverfi, félagslega þætti og stjórnarhætti fyrir árið 2020. Það er mat ráðgjafa að upplýsingar þær er koma fram í kaflanum um sjálfbærniskýrslu sjóðsins gefi góða mynd af ófjárhagslegum þáttum í rekstri sjóðsins. Um samsetningu stjórnar Hvað samsetningu stjórnar varðar þá fer um almennt hæfi stjórnarmanna til setu í stjórn lífeyrissjóðsins sam- kvæmt gildandi lögum á hverjum tíma. Í grein 5.8 í samþykktum LV er mælt fyrir um það að samtök atvinnu- rekenda, þ.e. Samtök atvinnulífsins og Félag atvinnurekenda, og VR hins vegar, skuli tryggja við skipun sinna fulltrúa í stjórn sjóðsins að kynjadreifing stjórnarmanna sé jöfn. Þá er mælt fyrir um það að aðildarsamtök lífeyrissjóðsins skulu hafa með sér samráð við tilnefningar sem tryggi að stjórn lífeyrissjóðsins búi sem heild yfir nægilegri þekkingu og reynslu til þess að rækja hlutverk sitt. Tilnefningar tilnefningaraðila eru staðfestar af fulltrúum viðkomandi aðildarsamtaka í fulltrúaráði LV sem samtals telur 50 manns, sbr. nánari ákvæði í greinum 5.4 til 5.7 í samþykktum LV. 79